काठमाडौं महानगरपालिकाका मेयर बालेन शाहले माघ ५ गते पदबाट राजीनामा दिएर चुनावी तयारीका लागि झापा जाने तयारी गरेको भन्ने आन्तरिक स्रोतको चर्चाले राजनीतिक वृत्तमा हलचल ल्याएको छ। औपचारिक पुष्टि नभए पनि यो चर्चा सामान्य हल्लामै सीमित छैन, किनकि बालेन शाह स्वयं नेपाली राजनीतिमा स्थापित ढर्रालाई चुनौती दिने पात्रका रूपमा हेरिँदै आएका छन्।
मेयर बनेपछि उनले काठमाडौं महानगरमा सुरु गरेका केही साहसी निर्णय, अव्यवस्था नियन्त्रणका प्रयास र प्रशासनिक सुधारका कदमले जनतामा आशा पनि जगायो, विवाद पनि सिर्जना गर्यो। यस्तो अवस्थामा उनको सम्भावित राजीनामाले एउटा गम्भीर प्रश्न उठाउँछ—व्यक्तिको राजनीतिक आकांक्षा महत्वपूर्ण कि जनताले दिएको जिम्मेवारीको निरन्तरता?
यदि बालेन शाह साँच्चिकै स्थानीय तहको नेतृत्व छोडेर राष्ट्रिय राजनीतितर्फ उन्मुख हुँदैछन् भने, यो उनको व्यक्तिगत निर्णय मात्र होइन, वैकल्पिक राजनीतिप्रतिको जनअपेक्षाको पनि परीक्षा हुनेछ। किनकि जनताले उनलाई केवल मेयर होइन, पुरानो राजनीतिक संस्कृतिलाई तोड्ने आशाको प्रतीकका रूपमा हेरेका छन्।
